ചരിത്രം

വിദ്യാലയചരിത്രം

ഹൈസ്കൂളുകള്‍ ഇല്ലാത്ത പഞ്ചായത്തുകളില്‍ ഹൈസ്കൂളുകള്‍ അനുവദിക്കുക എന്ന സര്‍ക്കാര്‍ നയത്തിന്റെ ഭാഗമായി 2008 ഫെബ്രുവരി 18 ന് ല്‍ വിദ്യാലയം പ്രവര്‍ത്തനമാരംഭിച്ചു. പടിയൂര്‍ പഞ്ചായത്തിലെ വട്ടപ്പാറ എന്ന സ്ഥലത്ത് താല്ക്കാലിക സംവിധാനത്തില്‍ 41 കുട്ടികളുമായി എട്ടാം ക്ലാസ് തുടങ്ങി. പാല ഗവ:ഹയര്‍ സെക്കന്‍ഡറി സ്കൂളിലെ ശ്രീ.കെ ചന്ദ്രന്‍ മാസ്റ്റര്‍ ഏകാദ്ധ്യാപകനായിരുന്നു. 2008 ജൂണില്‍, പുലിക്കാട് ടൗണില്‍ വാടകയ്ക്കെടുത്ത കടമുറികളില്‍ എട്ട്, ഒമ്പത് ക്ലാസ്സുകള്‍ പ്രവര്‍ത്തിച്ചു. ശ്രീ.പി.പി. രാഘവന്‍മാസ്റ്റര്‍ ചെയര്‍മാനും, ശ്രീ.എം.മുരളീധരന്‍ കണ്‍വീനറുമായ സ്പോണ്‍സറിംഗ് കമ്മിറ്റിയാണ് പ്രവര്‍ത്തനം നിയന്ത്രിച്ചത്. 2009 മാര്‍ച്ച് മാസം ജില്ലാ പഞ്ചായത്ത് വിദ്യാലയത്തിനുവേണ്ടി വട്ടപ്പാറയില്‍ 5 ഏക്കര്‍ സ്ഥലം വിലയ്ക്കെടുത്തു. കെട്ടിടം പണി ആരംഭിച്ചു. 2010 ജൂണ്‍ മാസം മുതല്‍ പുതിയ കെട്ടിടത്തില്‍ ക്ലാസ്സ് തുടങ്ങി. കണ്ണൂര്‍ ജില്ലാ പഞ്ചായത്ത് പ്രസിഡണ്ട് ശ്രീ.കെ.കെ.നാരായണന്‍, വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ശ്രീ.എം.സമ്പത്ത് കുമാര്‍, സെക്രട്ടറി ശ്രീ. രഘുരാമന്‍ എന്നിവര്‍ വളരെ താല്പര്യത്തോടെ സ്കൂളിന്റെ പ്രവര്‍ത്തനത്തില്‍ ഇടപെട്ട് ഭൗതികസാഹചര്യങ്ങളുടെ വളര്‍ച്ച ത്വരിതപ്പെടുത്തി. ശ്രീ.കെ.വി.രാഘവന്റെ നേതൃത്വത്തിലുള്ള പി.റ്റി.എ കമ്മിറ്റിയും സജീവമായി പ്രവര്‍ത്തിച്ചു. 2010 ല്‍ ആദ്യ എസ്.എസ്.എല്‍.സി ബാച്ച് മൂന്ന് ഫുള്‍ എ പ്ലസ് ഉള്‍പ്പെടുന്ന 100 ശതമാനം വിജയം നേടി. തുടര്‍ന്നുള്ള വര്‍ഷങ്ങളില്‍ 92% (2011), 94%(2012), 96%(2013), 98%(2014) വിജയം കരസ്ഥമാക്കി. 2010 ല്‍ തന്നെ സയന്‍സ്, കൊമേഴ് സ് വിഭാഗങ്ങളിലായി രണ്ട് പ്ലസ് ടു കോഴ്സുകളും ആരംഭിച്ചു. ജില്ലാ പഞ്ചായത്ത് 2013 ല്‍ ഈ വിദ്യാലയത്തെ മോഡല്‍ സ്കൂളായി തെരഞ്ഞെടുത്തു. പടിയൂര്‍ ഗ്രാമപഞ്ചായത്തിലെ ഏക സര്‍ക്കാര്‍ വിദ്യാലയമാണ് നമ്മുടെ സ്കൂള്‍. 
ഭൗതികസൗകര്യങ്ങള്‍ 

ശ്രദ്ധേയമായ ഐ.റ്റി പഠനപ്രവര്‍ത്തനങ്ങള്‍ കൊണ്ട് ജില്ലയിലെ അറിയപ്പെടുന്ന വിദ്യാലയമാണിത്. മികച്ച കംപ്യൂട്ടര്‍ വിദ്യാഭ്യാസം നല്‍കുന്നതിന് സുസജ്ജമായ കംപ്യൂട്ടര്‍ ലാബ് ഈ വിദ്യാലയത്തിന്റെ പ്രത്യേകതയാണ്. കേന്ദ്ര ശാസ്ത്ര സാങ്കേതിക വകുപ്പ് കേരളത്തിലെ തിരഞ്ഞെടുത്ത 79 വിദ്യാലയങ്ങള്‍ക്കായി അനുവദിച്ച ശാസ്ത്രപോഷിണി ലാബുകള്‍ ഈ വിദ്യാലയത്തിനും ലഭിച്ചിട്ടുണ്ട്. (ഫിസിക്സ്, കെമിസ്ട്രി, ബയോളജി വിഷയങ്ങള്‍ക്ക് പ്രത്യേകം ലാബുകള്‍), വിശാലമായ ഓഡിറ്റോറിയം, വിസ്തൃതമായ മൈതാനം, ഉച്ചഭക്ഷണപദ്ധതിക്കായി പുതിയ കെട്ടിടം മുതലായ ഭൗതികസൗകര്യങ്ങള്‍ നമ്മുടെ വിദ്യാലയത്തിന്റെ മുതല്‍ക്കൂട്ടാണ്.

ഒരു നല്ല വിദ്യാലയത്തിനുവേണ്ട ഭൗതികസാഹചര്യവും, അക്കാദമിക്-കലാ-കായിക-ശാസ്ത്രരംഗങ്ങളില്‍ ഉയര്‍ന്ന നിലവാരമുള്ള അദ്ധ്യാപകവൃന്ദവും സേവനസന്നദ്ധരായ ജീവനക്കാരും, ഈ വിദ്യാലയത്തിലെ കുട്ടികളുടെയും അവരുടെ രക്ഷിതാക്കളുടെയും അഭ്യുദയകാംക്ഷികളുടെയും സ്വപ്നങ്ങളെ യാഥാര്‍ത്ഥ്യമാക്കുന്നതിനായി ഇവിടെ പ്രവര്‍ത്തനനിരതരാണ്.
അഞ്ച് ഏക്കറോളം ഭൂവിസ്തൃതിയുള്ള സ്കൂൾ കാംപസിൽ രണ്ട് ബ്ലോക്കുകളിലായി ഹൈസ്കൂൾ, ഹയർ സെക്കൻഡറി വിഭാഗങ്ങൾ പ്രവർത്തിക്കുന്നു. മൂന്ന് ഡിവിഷനുകൾ വീതം ആകെ ഒമ്പത് ഡിവിഷനുകളുള്ള എട്ട്, ഒമ്പത്,പത്ത് ക്ലാസ്സുകളിൽ 303 കുട്ടികൾ ഹൈസ്കൂൾ വിഭാഗത്തിൽ പഠനം നടത്തുന്നു. പ്രധാനാദ്ധ്യാപിക ഉൾപ്പെടെ പതിനാറ് അദ്ധ്യാപകരും നാല് ഓഫീസ് ജീവനക്കാരും ഒരു സ്കൂൾ കൗൺസെലറും ഉൾപ്പെടെ 21 പേർ ഹൈസ്കൂൾ വിഭാഗത്തിൽ സേവനമനുഷ്ഠിക്കുന്നു. ഹയർ സെക്കൻഡറി വിഭാഗത്തിൽ സയൻസ്, കൊമേഴ്സ് വിഭാഗങ്ങളിലായി നാല് ഡിവിഷനുകൾ (പ്ലസ് വൺ -2, പ്ലസ് ടു -2) പ്രവർത്തിക്കുന്നു. പ്രിൻസിപ്പൽ ഉൾപ്പെടെ പതിമൂന്ന് അദ്ധ്യാപകരും രണ്ട് അനദ്ധ്യാപകരും അടക്കം പതിനഞ്ച് പേർ ഹയർ സെക്കൻഡറി വിഭാഗത്തിൽ സേവനമനുഷ്ഠിക്കുന്നു. 220 വിദ്യാർത്ഥികൾ നാല് ഡിവിഷനുകളിലായി പഠനം നടത്തുന്നു. പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി വിദ്യാലയത്തിനുണ്ടായ ഭൗതികവും അക്കാദമികവുമായ പുരോഗതിയുടെ ഗുണഫലങ്ങൾ വിദ്യാർത്ഥികൾക്ക് അനുഭവവേദ്യമായിക്കൊണ്ടിരിക്കുന്നു. ഹൈസ്കൂൾ-ഹയർ സെക്കൻഡറി വിഭാഗങ്ങളിലെ 13 ഡിവിഷനുകളും ഹൈടെക് ക്ലാസ് മുറികളായിരിക്കുന്നു.